ഒരു മുറിയുടെ ഓർമ്മ എന്ന നിലയിൽ ജനാല തുറക്കുമ്പോൾ

| ഒരു മുറിയുടെ ഓർമ്മ എന്ന നിലയിൽ ജനാല തുറക്കുമ്പോൾ |

മുറി

ഉറക്കം വരാതെ വീട്ടിൽനിന്നിറങ്ങിനടന്നാലെന്തെന്ന് നിനച്ചു.

പക്ഷെ

ഒരു മുറിയുടെ ഓർമ്മ എന്ന നിലയിൽ ജനാലയ്ക്കറിയാം;

മുറി ജനാലയ്ക്കപ്പുറം തൂങ്ങിമരിച്ചതാണ്

പണ്ടേയ്ക്കുപണ്ടേ

ആ നിലയ്ക്ക് മുറിയുടെ ഓർമ്മപ്പുസ്തകമാണീ ജനാല.

അല്ലെങ്കിലും

പൂവില്ലാപ്പൂക്കാലമേ

മഴയില്ലാത്തിടവമേ

വെയിലില്ലാവേനലേ

പാതിവഴിമടങ്ങുമ്പോൾ

എത്ര ഓർമ്മകളാൽ ചില്ലുമൂടിയിങ്ങനെ മരവിച്ചാലും

ജനാലപ്പാളികളായിങ്ങനെ

ഒരു വാക്കിന്റെ ഇങ്ങേക്കരയിൽനിന്ന്

മറുവാക്കിന്റെ അങ്ങേക്കരയിലേക്ക്

ജലയാനങ്ങൾ പോലെ നോട്ടങ്ങൾ നീന്തുന്നുണ്ട്.

അതുകൊണ്ടു മാത്രം തുറന്നടഞ്ഞ്

കാറ്റത്ത് ചില ജനാലകൾ.