ഒന്നെഴുതൂ: ചത്ത ദിവസമെന്നായിരുന്നുവെന്ന്

ഒറ്റവരിയിലെഴുതിത്തീർക്കാവുന്ന

ജീവിതത്തെ

എഴുതുന്നതിന്റേതാണ് സാറേ

സാറൊന്നുകൂടിയെഴുതിയാൽ മതി സാറേ

നിങ്ങടെ ജനനരജിസ്റ്ററിൽ എന്റെ പേരുണ്ടായിരുന്നു,

സർക്കാരിന്റെ തിണ്ണകളിൽ

അനുകൂല്യങ്ങൾ സാധാരണക്കാരുടെ അവകാശങ്ങൾ നേടിയെടുക്കാൻ

ഉച്ചക്കഞ്ഞികിട്ടുന്ന സ്കൂളുകളിൽനിന്ന്, അക്ഷരത്തേക്കാൾ

നിറച്ചുണ്ടത് , ഓ, അങ്ങനെയും,

സമരങ്ങളിൽ അണിയായി

തല്ലുകൊണ്ട്,

പരിഹസിക്കപ്പെട്ട്,

മോഷ്ടിച്ച്

കാട്ടം കോരി

മരിച്ചുപോയതാണ്,

എന്തോ രോഗമുണ്ടായിരുന്നു,

കഴിഞ്ഞതുകഴിഞ്ഞു

എന്റെ ജീവിതത്തെ വളരെപെട്ടെന്ന്

ഒന്നെഴുതിതീർക്കണം സാർ,

കാരണം

സാറിന്റെ എഴുത്തും

കണക്കും

വളരെ വളരെ പ്രധാനമാണല്ലോ