കവിത വായിക്കുന്നവരുടെ സാങ്കേതികപ്രശ്നങ്ങൾ

മഴയുള്ള ഒരു രാത്രിയിൽ മുട്ടിവിളിച്ചതാണ്

നനയുന്നുണ്ടാവും

തണുപ്പേറിയിരിക്കാം

പട്ടിണിയാവാം

പക്ഷെ

വാതിൽ തുറന്നില്ല.

ഇതു തന്നെയാണ് ലോകം

ഇതു തന്നെയാണ് മാന്യത, കുലീനത

എന്നൊക്കെ തോന്നുന്നില്ലേ?

കവിത വായിക്കുമ്പോൾ തോന്നുന്ന

ഈ രോഷമെല്ലാം

പുസ്തകത്തോടൊപ്പം അടച്ചുവെച്ചിരിക്കുകയാണോ?

ഇനി വല്ല സ്വപ്നവുമാണെങ്കിലോ

എങ്കിലോ കിടന്നുറങ്ങിയേക്കാം.